É más un dia normal
Dja N korda ku saúdi, obrigadu pa más un xansi, Deus
(Nhu libra-m di tudu ben ki ben pa mal)
I antis sobritudu proteje tudu kes k'é di-meu (ka nhu dexa falta-m)
Vontadi i sabedoria pa N nkara ku firméza dizafius di dia-dia
I sintidu di luta, forsa i perserveransa pa N trilha ku susésu tudu montanhas di vida
Deus, obrigadu pa tudu ki N ten
Nunka ka falta kumida riba nos méza, amén
Sen kau di pega, N pensa txeu na abri mô di tudu
Ma nun mumentu nhu ka dexa-m fika sen skudu
Deus, obrigadu pa tudu ki N ten
Nunka ka falta kumida riba nos méza, amén
Tive sufoku, tive notis sen luar, ma pétalas di sól sénpri traze un novu olhar

Dias sinzentu faze-m persebe ma txuba é nisisáriu, so ku sól planta ta seka
Ten un ténpu entri símia i kolhéta
Ki txoma prosésu i nu ten ki ta prende seta
Ma ten ténpu pa tudu ma tudu na si ténpu
I un dia ténpu ta leba tudu kel ki leba ténpu
(Ma tudu na si ténpu i un dia ténpu ta leba tudu kel ki leba ténpu)
Ma nha sonhu ka ten tamanhu
Nha menti ka ten tétu, mi é un loku vizionáriu
Déntu mi ten un puéta solitáriu
Un kriansa adormisidu i un Cabral revolusionáriu
Na nhas veias ten trasus di Vegeta, linhas di Paulo Coelho i trexus di Hemingway
Markas di Kwane Nkrumah, ma prinsípius di Jizús, rivólta di Rosa Parks (rivólta di Rosa Parks, a!)
Mi é tudu sonhus di mundu inkorporadu na menti i na alma di un pisoa so
N ta karega luta di tudu nhas ansestral ki na pasadu vive torturadu a bazi di pó

N sa li ta ratxa petu, ta sangra sen ninhun prokupason si es múzika ta singra
N kre toka na séu di bu korason, na profundézas di bu ser, sen inporta ku viraliza
Sen nunka vulgariza...
Mas sin anplia vizon di kenha ki vizualiza
(Mas sin anplia vizon di kenha ki vizualiza)
N disidi ser profundu nun mundu undi ki tudu k'é vaziu i aplauzível
Nu ta djunta mô pa nu distrui, ma na óra di konstrui tudu mô é invizível
Kantu Josslyn ki oji sta ku dipreson, fitxadu na kuartu ta pensa so na suisídiu
Pamó falta di inpatia ku nos prósimu i nos kapasidadi iguista di rasiosíniu
Ma N ta kridita na ser umanu, inda nha kabalu sta na txuba pamó
Pa nu odja arku-iris é obrigatóriu nu prende gosta di txuba