Aikovéreve hi'ã revy'ami chendive
Sapy'amínte jepe, ndaikatúiramo are
Ami tamaño rire nderekéi pe pyhare
Vaikuépe neko'ê reimeségui chendive

Aikovéreve hi'ã vevuini chepojopy
Che korasõ tahory, tovy'a, tahetia'e
Ani a mano rire pe che ári rejeity
Reñohê nde resay, ndaha'éi mba'evete

Aikovéreve hi'ã pumbyrýpe cherenói
Che apysápe tahemói ahendúvo ne ñe'ê
Ani amano rire mombyrýgui rehuã'i
Jechaukaségui rei rejúva cherechase

Aikovéreve hi'ã che jopói yvotymi
Peteî ha'eñomi, avy'áta heseve
Ani amano rire yvotytýpe chemoî
Upéva vyrorei, opáma che rekove

Aikovéreve hi'ã cherehe reñembo'e
Pytu'úpe taikove, tovy'a che kuaaha
Ani amano rire tupão remyenyhê
Pa'i remoñembo'e, opáma che vy'arã

Aikovéreve hi'ã kerambipúpe reju
Mbarakánte regueru, javy'a oñondive
Ani a mano rire atyguasu nemoirû
Yvy remosununu, rembovy'a ambue

Aikovéreve hi'ã ñe'epoty mbykymíme
Reguahê che tapỹimíme chejopoihag̃ua ipype
Ani amano rire che tyvýre remoî
Ñe'ê jeguaparei, ndaha'éi mba'evete

Aikovéreve hi'ã revy'ami chejave
Ñamyeñói oñondive mborayhu mimbi sakã
Upéijepe tambota amo yvága rokê
Topytu'u che rete, yvyguýpe topyta